Prezident farmoni bilan 852 nafar mahkum afv etildi
O‘zbekiston Respublikasi Konstitutsiyasining tegishli moddasiga asosan qabul qilingan ushbu farmon doirasida 604 nafar shaxs jazodan to‘liq ozod etiladi. Shuningdek, 115 kishi jazoni o‘tashdan muddatidan ilgari shartli ozod qilinayotgan bo‘lsa, 52 nafar mahkumning jazosi yengilrog‘iga almashtiriladi hamda 81 kishining ozodlikdan mahrum etish muddati qisqartiriladi.
Afv etilganlar safida jamiyatning turli qatlamlariga mansub fuqarolar mavjud. Xususan, ularning 375 nafari yoshlar, 49 nafari ayollar, 37 nafari 60 yoshdan oshgan erkaklar va 7 nafari xorij fuqarolaridir. Bundan tashqari, taqiqlangan tashkilotlar faoliyatida qatnashib, to‘g‘ri yo‘lga kirgan 63 nafar shaxs ham afv ro‘yxatiga kiritilgan.
Mamlakatda insonparvarlik siyosati doirasida 2017-yildan buyon Prezidentning afv etishga oid 31 ta farmoni e’lon qilingan. Mazkur hujjatlar asosida shu kunga qadar jami 10 567 nafar mahkumga muruvvat ko‘rsatilib, ular o‘z oilasi bag‘riga qaytarilgan.
