Poytaxtda katta uyi borlar isitish tizimi uchun 5 baravar ko‘p to‘lashi mumkin
30-iyul kuni o‘tkazilgan muloqotda taqdim etilgan taklifga ko‘ra, 2026-yilda issiqlik ta’minoti uchun ajratiladigan 3,8 trillion so‘mlik subsidiyaning 77 foizi (2,9 trillion so‘m) faqat Toshkent shahriga to‘g‘ri kelmoqda. Hozirda poytaxt aholisi amaldagi narxning 20 foizidan ham kamrog‘ini to‘laydi, qolgan 80 foizi esa davlat budjetidan qoplanadi.
Muassasa amaldagi tizimni adolatsiz deb bilmoqda, chunki davlat yordami xonadonlarning daromadi va mulkiy holatidan qat’i nazar berilmoqda. Shu sababli bosqichma-bosqich ijtimoiy me’yor tizimiga o‘tish ilgarilari surilmoqda:
• Bir xonadon uchun 60 kvadrat metr (yoki har bir yashovchiga 16 kv.m) bazaviy meyor etib • belgilanadi;
• Meyordan ortiqcha maydon uchun to‘lov amaldagidan 5 baravar qimmatroq (to‘liq bazaviy tarifda) amalga oshiriladi;
• Ikkinchi va undan keyingi turar joylar hamda yuridik shaxslar uchun to‘lovlar ham bosqichma-bosqich 100 foizlik tarifga o‘tkaziladi.
Kelgusida asosiy yordamni Ijtimoiy himoya yagona reyestri orqali faqat ehtiyojmand qatlamga manzilli ko‘rsatish rejalashtirilgan. Ta’kidlanishicha, ushbu islohot kichik uylarda yashaydigan aholiga ta’sir qilmaydi – Toshkentdagi maydoni 60 kvadrat metrgacha bo‘lgan 45,4 foiz xonadonlar uchun amaldagi arzon tariflar to‘liq saqlanib qoladi.
