Payariqda hovlidan qadimiy bronza taqinchoqlar topildi
Darvozag‘aza qishlog‘ida sodir bo‘lgan ushbu hodisada fuqaro yer ishlarini bajarish jarayonida inson suyaklari, bronza bilakuzuklar hamda turli mayda munchoqlarni topib olgan. Xonadon egasi bu haqda Yahyo G‘ulomov nomidagi Samarqand arxeologiya institutiga zudlik bilan xabar bergan. Yetib kelgan mutaxassislar ashyolarni belgilangan tartibda rasmiylashtirib, ilmiy tadqiqotlar o‘tkazish uchun qabul qilib olgan.
Samarqand arxeologiya instituti direktori Mo‘minxon Saidovning ma’lum qilishicha, dastlabki ko‘rik davomida topilgan bronza bilakuzuklarning konussimon uchlari va spiralsimon bezaklari diqqatni tortadi. Ushbu buyumlarning shakli va ishlanish uslubi bronza davrining so‘nggi bosqichida yashagan dasht chorvador qabilalari madaniyatiga juda yaqin hisoblanadi.
Zarafshon vodiysida avval topilgan shunday yodgorliklar, odatda, miloddan avvalgi XIII–X asrlarga oid Andronovo – Tozabog‘yob madaniy doirasi bilan bog‘lanadi. Shunga qaramay, Payariqdagi yangi topilmaning aniq davri hamda qaysi madaniyatga mansubligi antropologik tahlillar va laboratoriya tekshiruvlaridan so‘ng uzil-kesil tasdiqlanadi.
Avvalroq Surxondaryoda mil. avv. 1700–1500-yillarga oid qadimiy qabriston topilgani xabar qilingan edi.
