O‘zbekistonliklar salomatligi uchun qancha pul sarflamoqda?
Milliy statistika qo‘mitasi ma'lumotlariga ko‘ra, yanvar–iyun oylarida respublika bo‘yicha sog‘liqni saqlash xizmatlari hajmi 11,3 trillion so‘mga yetdi. Soha tarkibida eng katta ulush – 53,7 foiz boshqa turdagi xizmatlarga, 31,8 foiz shifoxonalarga hamda 14,5 foiz tibbiy amaliyot va stomatologiyaga to‘g‘ri kelgan.
Xarajatlar va ko‘rsatilgan xizmatlar hajmi bo‘yicha Toshkent shahri yaqqol yetakchi – poytaxtda 5,2 trillion so‘mlik tibbiy xizmat ko‘rsatilgan. Keyingi o‘rinlarni Toshkent viloyati (1,1 trillion so‘m) hamda Samarqand viloyati (830,2 milliard so‘m) egalladi. Farg‘onada bu ko‘rsatkich 675,4 milliard, Namanganda 550,4 milliard va Andijonda 507,2 milliard so‘mni tashkil etgan.
Boshqa hududlarda ko‘rsatkichlar quyidagicha bo‘ldi: Buxoroda 392,3 milliard, Xorazmda 390,9 milliard, Qashqadaryoda 360,4 milliard va Qoraqalpog‘istonda 335,5 milliard so‘m. Eng kam mablag‘ Surxondaryo (262 milliard), Jizzax (251,5 milliard), Sirdaryo (203,2 milliard) hamda Navoiy (193,1 milliard) viloyatlarida sarflangan.
