O‘zbekistonlik olima Xalqaro Matematika Ittifoqi qo‘mitasi a'zoligiga saylandi
AQShning Nyu-York shahrida Xalqaro Matematika Ittifoqi (International Mathematical Union — IMU) Bosh Assambleyasining navbatdagi yig‘ilishida Xorazm Ma’mun akademiyasi bosh ilmiy xodimi, professor Umida Boltayeva IMUning Rivojlanayotgan davlatlar qo‘mitasi (Committee for Developing Countries) a’zoligiga saylandi. Bu haqda Fanlar akademiyasi xabar berdi.
Ma'lumotlarga ko'ra, Unda dunyoning yetakchi matematik olimlari, milliy matematika jamiyatlari rahbarlari hamda IMU rahbariyati ishtirok etdi.
Shuningdek, O‘zbekiston Fanlar akademiyasi Matematika instituti laboratoriya mudiri, professor Ravshan Ashurov ham Bosh Assambleya muhokamalarida faol ishtirok etdi. U xorijlik hamkasblari bilan ilmiy hamkorlikni kengaytirish, qo‘shma loyihalarni yo‘lga qo‘yish hamda institutsional aloqalarni mustahkamlash yuzasidan qator uchrashuvlar o‘tkazdi.
Qayd etilishicha, mazkur yig‘ilish O‘zbekiston matematiklarining xalqaro ilmiy hamjamiyatdagi faolligi va nufuzini oshirish, yangi ilmiy hamkorliklarni rivojlantirish hamda mamlakat matematika maktabining xalqaro maydondagi o‘rnini yanada mustahkamlashda muhim ahamiyat kasb etadi.
Ma'lumot o'rnida, Xalqaro Matematika Ittifoqi (IMU) matematika fanini rivojlantirish va xalqaro ilmiy hamkorlikni qo‘llab-quvvatlovchi nufuzli tashkilot hisoblanadi. Uning Rivojlanayotgan davlatlar qo‘mitasi esa ushbu yo‘nalishda rivojlanayotgan mamlakatlarga ko‘maklashadi.
