O‘zbekistonga kelayotgan xorijiy talabalarning qariyb 70 foizi asosan tibbiyot yo‘nalishini tanlamoqda

Xorijiy talabalar orasida eng katta ulushni Hindiston fuqarolari tashkil etadi — 13 060 nafar yoki 53 foiz. Keyingi o‘rinlarda Turkmaniston — 4 884 nafar (20 foiz), Pokiston — 1 165 nafar (5 foiz) va Qozog‘iston — 1 129 nafar (5 foiz) turadi.

Xorijliklar eng ko‘p qaysi yo‘nalishda o‘qimoqda?

Xorijiy talabalar uchun O‘zbekistondagi eng ommabop yo‘nalish tibbiyot bo‘lib qolmoqda. Jami 16 476 nafar xorijiy talaba aynan tibbiyot yo‘nalishida tahsil olmoqda.

Bu umumiy xorijiy talabalar kontingentining qariyb 67 foizini tashkil etadi. Ya’ni O‘zbekistonda ta’lim olayotgan xorijiy talabalarning qariyb uch nafardan ikki nafari tibbiyot sohasini tanlagan.

Keyingi o‘rinlarda:

* Filologiya va tillar — 2 109 nafar;

* Biologiya — 831 nafar;

* Tarix — 588 nafar;

* Iqtisodiyot — 515 nafar;

* AKT — 455 nafar;

* Amaliy matematika — 217 nafar;

* Kimyo — 191 nafar;

* Mexanika modellashtirish — 157 nafar;

* Geografiya — 144 nafar.

Xorijiy talabalar qayerlarda ko‘proq tahsil olmoqda?

Xorijiy talabalar eng ko‘p Toshkent shahrida tahsil olmoqda — 11 556 nafar (47 foiz). Samarqandda 4 382 nafar (18 foiz), Buxoroda 2 879 nafar (12 foiz), Farg‘onada 1 809 nafar (7,3 foiz) xorijiy talaba bor.

Talabalarning asosiy qismi davlat oliy ta’lim tashkilotlariga to‘g‘ri keladi — 22 685 nafar (92 foiz). Nodavlat OTMlarda 1 468 nafar, xorijiy OTMlarda esa 494 nafar xorijiy talaba tahsil olmoqda.

Xorijiy talabalar soni bo‘yicha yetakchi OTMlar orasida Toshkent davlat tibbiyot universiteti — 4 155 nafar, Samarqand davlat tibbiyot universiteti — 4 153 nafar va Buxoro davlat tibbiyot instituti — 2 178 nafar talabaga ega.