O‘zbekistonda yilning birinchi yarmida 1,2 million kishi kambag‘allikdan chiqarildi
Xabarga ko‘ra, “Ijtimoiy reyestr”ga kiritilgan 563 ming oilaning daromadlarini oshirish bo‘yicha individual rejalar amalga oshirildi. Buning natijasida 275 ming oila yoki 1,2 million nafar aholi kambag‘allik toifasidan chiqarildi va mamlakatda kambag‘allik darajasi 4,5 foizga tushdi. Yil yakuniga qadar ushbu ko‘rsatkichni 2,8 foizgacha qisqartirish rejalashtirilmoqda.
Dastlabki yarim yillikda 3,8 million nafar fuqaro daromadli mehnatga jalb etilib, ulardan 469 bin nafari doimiy ish o‘rinlariga joylashtirildi hamda 615 mingta norasmiy ish o‘rni legallashtirildi. Mahallalarda yo‘lga qo‘yilgan 103 mingta mikroloyiha esa 246,5 ming nafar kishini barqaror daromad manbai bilan ta’minladi.
Ehtiyojmand oilalarni qo‘llab-quvvatlash doirasida 939 ming nafar fuqaro tibbiy ko‘rikdan o‘tkazildi, 49 ming nafar farzand esa IT, xorijiy tillar va raqamli kasblar bo‘yicha bepul o‘qitildi. Deputatlar vazirlikka ajratilayotgan kreditlar samarasini baholash va “mahallabay” monitoring tizimini yanada kuchaytirish bo‘yicha tavsiyalar berdi.
