O‘zbekistonda yarim yilda 2,2 mingdan ziyod YTH bo‘ldi. Toshkent shahri yetakchi, Buxoro eng xavfsiz hudud
Milliy statistika qo‘mitasi joriy yilning dastlabki olti oyidagi YTH ko‘rsatkichlarini ochiqladi. Unga ko‘ra, mamlakat bo‘yicha jami 2 286 ta yo‘l-transport hodisasi ro‘yxatga olingan bo‘lib, buning oqibatida 3 306 kishi jabrlangan.
Avariyalar soni bo‘yicha Toshkent shahri yaqqol yetakchilik qilmoqda – 420 ta holat. Keyingi o‘rinlardan Samarqand (311 ta), Toshkent viloyati (271 ta), Farg‘ona (218 ta) va Namangan viloyati (196 ta) joy olgan.
Eng kam YTH Buxoroda qayd etildi – 48 ta. Shuningdek, Sirdaryo (50 ta), Jizzax (75 ta), Navoiy (83 ta) va Xorazmda (85 ta) nisbatan past ko‘rsatkichlar kuzatilgan.
Boshqa hududlardagi raqamlar:
Andijon – 160 ta;
Qashqadaryo – 135 ta;
Surxondaryo – 120 ta;
Qoraqalpog‘iston – 114 ta.
Avvalroq Toshkentning Do‘rmon va G‘azalkent ko‘chalari kesishmasida 3 nafar YPX inspektori mototsiklda Onix bilan to‘qnashgan va hodisa oqibatida bir inspektor halok bo‘lgan edi. Ushbu voqeadan so‘ng Prezident Davlat xavfsizlik xizmati rahbari Alisher Usmonov lavozimidan ozod etilgan.
