O‘zbekistonda yarim yil ichida ish joylaridagi baxtsiz hodisalar oqibatida 137 nafar ishchi vafot etdi
Mehnat inspeksiyasi O‘zbekistonda 2026-yilning birinchi yarim yilligida ishlab chiqarish va ish joylarida sodir bo‘lgan baxtsiz hodisalar statistikasini e’lon qildi.
Ma'lum qilinadiki, yarim yil ichida 447 ta baxtsiz hodisa ro‘y bergan bo‘lib, shulardan 21 tasi guruhli, 311 tasi og‘ir oqibatli va 113 tasi o‘lim bilan yakunlangan hodisalardir. Jabrlangan 494 nafar ishchining 337 nafari og‘ir, 20 nafari yengil jarohat olgan, 137 nafari esa vafot etgan.
Baxtsiz hodisalarning asosiy qismi mehnat muhofazasiga yuqori talab qo‘yiladigan tarmoqlarga to‘g‘ri kelmoqda:
- Sanoat sohasi – 144 ta holat;
- Qurilish sohasi – 127 ta holat.
Hududlar kesimida tahlil qilinganda, Toshkent shahrida jabrlangan ishchilar ulushi qolgan hududlarga nisbatan eng yuqori ko‘rsatkichni (95 ta holat) tashkil etdi.
Mehnat inspeksiyasi aralashuvi va olib borilgan o‘rganishlar natijasida, jabrlangan ishchilar hamda marhumlarning oila a’zolariga jami 10 milliard 376 million so‘m miqdorida biryo‘la beriladigan va oylik zarar pullari undirib berilgan.
