O‘zbekistonda turizm sohasida “siesta” tizimi va madaniy obyektlarining tungi ish rejimi joriy etilishi mumkin
Toshkent, Samarqand, Buxoro va Xiva shaharlarida tajriba-sinov tariqasida har yili 1-iyundan 31-avgustga qadar turizm sohasi korxonalari va tashkilotlari uchun “Siesta” ishini tashkil etish tizimi joriy etilmoqda.
Bu haqda Turizm qo‘mitasi yoz oylarida turizm sohasining ish tartibini o‘zgartirishni nazarda tutuvchi Prezident qarori loyihasida so‘z borgan.
Loyihaga ko‘ra, yangi tartib mehmonxonalar, xostellar, mehmon uylari, muzeylar, tarixiy obidalar, restoran va kafelar, turoperatorlar hamda boshqa turizm obyektlariga tatbiq etiladi.
Taklifga ko‘ra, turizm infratuzilmasining ish vaqti uch davrga bo‘linadi:
- 07:00–13:00 — ertalabki ish rejimi;
- 13:00–17:00 — “siesta” vaqti, ya’ni kunning eng issiq paytida tanaffus;
- 17:00–23:00 — kechki ish rejimi.
- Shu bilan birga, kunduzgi tanaffus vaqtida ham turizm obyektlari tashrif buyuruvchilar uchun qulay sharoitlarni saqlab qolishi lozim. Jumladan, konditsionerlar ishlashi, zarur xodimlar faoliyatini davom ettirishi hamda mehmonlarga xizmat ko‘rsatish to‘xtatilmasligi kerak.
- Loyihada ta’kidlanishicha, yangi ish jadvaliga o‘tish xodimlarning ish haqi kamayishiga yoki mehnat sharoitlari yomonlashishiga olib kelmasligi lozim.
Bundan tashqari, kechki turizmni rivojlantirish ham rejalashtirilgan. Jumladan, “Tungi muzey” va “Kechki ekskursiya” dasturlarini yo‘lga qo‘yish, kafe va restoranlarda yozgi menyularni joriy etish, shuningdek, kechki vaqtlarda ko‘proq madaniy, gastronomik va ko‘ngilochar tadbirlarni tashkil etish taklif etilmoqda.
Shuningdek, yangi ish rejimiga mos ravishda jamoat transporti harakati, ko‘cha yoritish tizimi hamda turistik hududlarni obodonlashtirish ishlari ham moslashtirilishi rejalashtirilgan.
Turizm qo‘mitasi 2026-yil 1-noyabrga qadar pilot loyiha natijalarini baholab, uni kelgusida kengroq qo‘llash bo‘yicha takliflarni taqdim etishni rejalashtirmoqda.
