O'zbekistonda tug'ilgan IT milliarderi Qozog'iston fuqaroligini oldi

Pasportni Mashrabovga shaxsan Qozog'iston bosh vaziri o'rinbosari — sun'iy intellekt va raqamli rivojlanish vaziri Jaslan Madiev topshirdi. Vazir buni ijtimoiy tarmoqdagi sahifasida e'lon qilib, "Qozog'istonda yana bir milliarder paydo bo'ldi" degan mazmunda izoh berdi. Ma'lumotga ko'ra, tadbirkor Qozog'iston pasportini olish uchun avval Rossiya fuqaroligidan voz kechgan. Shuningdek, mamlakat qonunchiligiga ko'ra, ikki fuqarolikka yo'l qo'yilmaydi.

Ma'lumotlarga ko'ra, Mashrabov O'zbekistonda tug'ilgan, Moskva fizika-texnika institutini tamomlagan va dastlab "Yandex" kompaniyasida mashinali o'qitish muhandisi sifatida faoliyat yuritgan. Keyinchalik u AI Factory nomli startap asoschilaridan bo'lgan - kompaniya 2020-yilda amerikalik Snap tomonidan 166 million dollarga sotib olingan.

Hozirda Mashrabovning boshchiligidagi Higgsfield - generativ sun'iy intellekt sohasidagi yirik platformalardan biri. Rossiya Forbes jurnali tadbirkorning kompaniyadagi ulushini 5,4 milliard dollarga baholab, uni milliarderlar ro'yxatiga yangi qo'shilishi mumkin bo'lgan shaxslar qatoriga kiritgan. Rasmiy ro'yxatga hali kirmagan bo'lsa-da, "milliarder" maqomi Qozog'iston rasmiylari va xalqaro ommaviy axborot vositalari tomonidan ham qo'llanmoqda.

Bloomberg nashri qayd etishicha, Mashrabov Qozog'iston pasportini olgan eng so'nggi badavlat rossiyalik tadbirkor bo'ldi. Tadbirkorning o'zi esa Higgsfield tarixini Qozog'iston bilan uzviy bog'liqligini ta'kidlab, hamkorining mamlakatda kuchli muhandislik bazasi mavjudligini aytgan.