O‘zbekistonda sudlanayotganlar soni keskin oshdi
Oliy sud e’lon qilgan ma’lumotlarga ko‘ra, sudlanganlar ko‘rsatkichi barcha toifadagi jinoyatlar bo‘yicha o‘sgan. Xususan, ko‘rib chiqilgan ishlarning eng katta qismini ijtimoiy xavfi katta bo‘lmagan jinoyatlar tashkil etgan bo‘lib, 22 066 kishiga tegishli ushbu ko‘rsatkich so‘nggi besh yildagi eng yuqori darajaga yetdi. Shuningdek, uncha og‘ir bo‘lmagan jinoyatlar bo‘yicha 11 428 kishining ishi ko‘rib chiqilib, 12 foizlik o‘sish qayd etildi.
Xavflilik darajasi yuqori bo‘lgan qilmishlar bo‘yicha ham raqamlar sezilarli darajada ortgan. Og‘ir jinoyatlar bo‘yicha ishlar 13 795 kishiga nisbatan ko‘rilib, 18 foizga, o‘ta og‘ir jinoyatlar esa 2 416 kishiga taalluqli bo‘lib, 19 foizga ko‘paygan. Ma’lumot uchun, o‘tgan 2025-yilning to‘liq davomida jami 79 550 kishiga oid jinoyat ishlari ko‘rib chiqilgan.
Hududlar kesimida sud qarorlari eng ko‘p Toshkent shahrida chiqarilgan – poytaxtda 6 639 kishining ishi ko‘rilgan. Keyingi o‘rinlarni Farg‘ona (6 159 kishi), Toshkent (5 498 kishi) hamda Samarqand (5 461 kishi) viloyatlari egalladi.
