O‘zbekistonda shifokor va farmatsevtlarni majburiy davlat ro‘yxatidan o‘tkazish tizimi joriy etiladi
Prezident Shavkat Mirziyoyevga taqdim etilgan yangi loyihaga ko‘ra, 2027-yildan shifokor hamda farmatsevt xodimlarni ixtiyoriy, 2030-yildan esa majburiy tartibda davlat ro‘yxatidan o‘tkazish rejalashtirilmoqda. Ushbu tizim doirasida barcha mutaxassislarni qamrab oluvchi va 16 ta axborot bazasi bilan bog‘lanadigan yagona elektron reyestr yaratiladi. Maxsus reyestrga kirmagan hamda mustaqil imtihonlardan o‘ta olmagan shaxslarga tibbiy yoki farmatsevtik faoliyat bilan shug‘ullanishga ruxsat berilmaydi.
Tizimga erta va ixtiyoriy ravishda qo‘shilgan kadrlar uchun moddiy rag‘batlantirish choralari ko‘zda tutilgan. Xususan, imtihonlarni topshirib, ro‘yxatdan o‘tgan oliy ma’lumotli shifokor va farmatsevtlarga mehnatga haq to‘lashning eng kam miqdorining 5 baravarigacha, o‘rta tibbiyot xodimlariga esa 2,5 baravarigacha oylik ustama to‘lash taklif etildi. Bilim va amaliy tayyorgarlik simulyatsion bazalar hamda yagona testlar orqali baholanib, sinovdan o‘ta olmaganlarga uni qayta topshirish imkoni beriladi.
Bundan tashqari, soha vakillari uchun kredit-modul tizimiga asoslangan uzluksiz ta’lim joriy etiladi. Unga ko‘ra, oliy ma’lumotli xodimlar har yili kamida 50 kredit, o‘rta tibbiyot xodimlari esa 28 kredit to‘plashi shart qilib belgilanadi. Mutaxassislar o‘quv shakli va dasturlarni mustaqil tanlash imkoniyatiga ega bo‘ladi, xalqaro akkreditatsiyadan o‘tgan xorijiy kurslarda to‘plangan kreditlar esa O‘zbekistonda to‘g‘ridan-to‘g‘ri tan olinadi.
