Oʻzbekistonda mobil reklama va spam-xabarlarga cheklovlar oʻrnatiladi
Prezidentning “Aholiga koʻrsatilayotgan davlat xizmatlarini takomillashtirish hamda fuqarolar uchun qoʻshimcha qulayliklar yaratish chora-tadbirlari toʻgʻrisida”gi qaroriga koʻra, voyaga yetmagan fuqarolar oʻz huquqlarini himoya qilish uchun sudga murojaat qilganda davlat bojini toʻlashdan ozod etiladi.
Shuningdek, 2026-yil 1-oktyabrdan fuqarolarning shaxsiy maʼlumotlari (F.I.SH. yoki tugʻilgan sanasi) oʻzgargan taqdirda, barcha davlat organlarining axborot tizimlarida elektron shaklda avtomatik yangilanishi yoʻlga qoʻyiladi.
2026-yil 1-noyabrdan boshlab esa mobil aloqa orqali reklama xabarlari yuborish uchun qabul qiluvchining oldindan yozma yoki elektron roziligini olish majburiy boʻladi. Mobil reklama tarqatuvchi kompaniyalar oʻz tizimlarini shaxsiy maʼlumotlar bazalari davlat reyestridan roʻyxatdan oʻtkazishi shart. Telekommunikatsiya tarmoqlari orqali reklama qoʻngʻiroqlari va xabarlarini soat 18:00 dan 09:00 gacha tarqatish taqiqlanadi.
Bundan tashqari, mobil operatorlar abonentning birinchi soʻroviga koʻra bunday xabarlarni bloklashga majbur boʻladi. Mazkur talablarni buzganlarga nisbatan qonuniy choralar koʻriladi.
