O‘zbekistonda kambag‘allikni qisqartirishda sun’iy intellektdan foydalaniladi
Kambag‘allikni qisqartirish va bandlik vazirligi mamlakatda kambag‘allik ko‘rsatkichi 5,8 foizdan 3,9 foizga tushganini ma’lum qildi. Joriy yilning o‘tgan sakkiz oyida 515 ming oila uchun individual rivojlanish rejasi tuzilib, 161 ming kishi doimiy ishga joylashtirildi, 304 ming fuqaro esa tadbirkorlik subyektlariga biriktirildi. Mahallalarda 55 mingga yaqin mikroloyihalar amalga oshirilishi natijasida 164 ming fuqaroning daromad manbayi kengaytirildi va 3 429 ta mahalla hamda 49 ta tuman kambag‘allikdan to‘liq xoli bo‘lgan hududlar qatoriga kirdi.
Sohada samaradorlikni oshirish maqsadida endilikda “avval tashxis – keyin yechim” tamoyili asosida ishlaydigan yangi raqamli tizim amaliyotga tatbiq etilmoqda. Unga ko‘ra, mutasaddilar xonadonlarni birma-bir o‘rganib, fuqarolarga oid ma’lumotlarni “Onlayn mahalla” platformasiga kiritadi. Ishsizlik sabablari aniqlangach, “Ombor kitobi” shakllantiriladi hamda sun’iy intellekt yordamida muammolar xususiyati bo‘yicha toifalangan fuqarolar "mahalla yettiligi" vakillariga biriktiriladi.
Yangi tizim doirasidagi chora-tadbirlar har chorakda yangilanib boriladi va hozirda bu boradagi ishlarni muvofiqlashtirish uchun hokimlar rahbarligida “favqulodda shtablar” faoliyati yo‘lga qo‘yilgan. Hukumat yil yakuniga qadar yana 230 ming oilani kambag‘allik sinovidan olib chiqish hamda jami 1 million aholining daromad darajasini oshirishni rejalashtirgan.
