O‘zbekistonda islomiy banklar va “islomiy darchalar” faoliyati rasman tartibga solindi
O‘zbekistonda islomiy banklar hamda an’anaviy banklar qoshida “islomiy darchalar” faoliyatini tashkil etish va litsenziyalash bo‘yicha yangi tartiblar joriy etildi. Adliya vazirligi Bank faoliyatiga ruxsat berish tartibi va shartlari to‘g‘risidagi nizomga kiritilgan tegishli o‘zgartirishlarni davlat ro‘yxatidan o‘tkazdi.
Yangi tartibga ko‘ra, islomiy bank faoliyati maxsus litsenziya asosida amalga oshiriladi. Islomiy bank yoki “islomiy darcha” tashkil etishda quyidagi asosiy shartlar belgilandi:
• Islomiy moliya kengashi: Kengash kamida 3 nafar a’zodan iborat bo‘lishi va ularning nomzodi Markaziy bank bilan kelishilishi shart. Kengash a’zolari bosqichma-bosqich AAOIFI xalqaro tashkiloti sertifikatlariga ega bo‘lishi, islom huquqi bo‘yicha mutaxassislar esa arab tilini bilishi lozim.
• Mas’ul rahbar va siyosat: Markaziy bank malaka talablariga javob beradigan mas’ul rahbar xodim mavjud bo‘lishi hamda islomiy moliya standartlariga muvofiqlik siyosati ishlab chiqilishi talab etiladi.
Shuningdek, hujjat bilan Markaziy bank bilan kelishilgan rahbar xodimlar ishga kirishgani haqida 5 ish kuni ichida regulyatorga yozma xabar berish talabi bekor qilindi.
