O‘zbekistonda har ming kishiga 129 ta mashina to‘g‘ri kelmoqda
2026-yilning 1-iyul holatiga ko‘ra, O‘zbekistonda fuqarolarga tegishli avtotransport vositalari soni 4,98 milliondan oshdi. Transport parkining asosiy qismini 4,6 milliondan ziyod yengil avtomobillar tashkil etadi, qolgani esa yuk mashinalari, mikroavtobuslar hamda maxsus texnikalardir.
Hududlar kesimida eng ko‘p avtomobil Toshkent shahri (637 mingdan ziyod), Farg‘ona hamda Samarqand viloyatlarida hisobga olingan.
Respublika bo‘yicha har 1000 nafar aholiga o‘rtacha 129,4 ta avtotransport to‘g‘ri keladi (yengil mashinalarning o‘zi 119,9 ta). Ushbu ko‘rsatkich bo‘yicha Toshkent shahri (199 ta), Toshkent viloyati (149 ta) va Buxoro (146 ta) yetakchilik qilayotgan bo‘lsa, Jizzax (92 ta), Namangan (104 ta) hamda Qoraqalpog‘istonda (107 ta) ko‘rsatkichlar mamlakat o‘rtacha darajasidan ancha pastligicha qolmoqda.
So‘nggi yillarda mahalliy ishlab chiqarish va taklif hajmi keskin oshgani kuzatildi. Masalan, 2017 yilda 135 mingta avtomobil ishlab chiqarilgan bo‘lsa, 2025 yilga kelib bu raqam 3,4 baravarga ko‘payib, 458 mingtaga yetdi. Natijada 2010-yilda har 100 ta xonadonga 21 ta yengil mashina to‘g‘ri kelgan bo‘lsa, 2025-yil yakunlariga ko‘ra bu ko‘rsatkich 61 ta alohida xonadonni qamrab olgan.
Shunga qaramay, global va mintaqaviy miqyosda O‘zbekistondagi ko‘rsatkich o‘ta past hisoblanadi. Taqqoslash uchun, har 1000 kishiga to‘g‘ri keladigan avtomobillar soni AQShda 850–890 ta, Yevropa Ittifoqida 560–600 ta, Rossiyada 320–340 ta, Qozog‘istonda 240–260 ta hamda Qirg‘izistonda 180–200 tani tashkil etadi.
Ekspertlar mamlakatda aholi soniga nisbatan avtomobillar miqdorining kamligini avtobozorning uzoq yillar davomida yopiq va sun’iy cheklovlar ostida ushlab turilgani bilan izohlaydi.
