O‘zbekistonda dual ta’lim talabalari suhbat orqali imtihonsiz o‘qishga qabul qilinadi va maoshining yarmi davlat tomonidan to‘lab beriladi
Yangi tizim dastlab 75 ta oliy ta’lim muassasasida sinovdan o‘tkazilib, 2028-yildan e’tiboran mamlakatdagi barcha oliygohlarda to‘liq tatbiq etiladi. Loyihaga ko‘ra, dual ta’lim doirasida ishga kirgan talabalar maoshining 50 foizi davlat subsidiyasi hisobidan qoplanadi, shuningdek, uzoq hududlarda joylashgan korxonalarga amaliyotga borgan talabalar uchun ijara xarajatlari ham to‘lab beriladi.
Bunda ishlab chiqarish va amaliyot jarayoniga biriktirilgan korxona ustozlariga oliygoh pedagoglari ish haqiga teng miqdorda qo‘shimcha haq to‘lanadi. O‘qish va ish faoliyatida yuqori natijalarga erishgan talabalar ikkinchi kursdan e’tiboran davlat grantiga o‘tkazilishi nazarda tutilgan.
Dual ta’lim tizimini samarali va namunali tashkil etgan uchta oliy ta’lim muassasasi hamda ularning hamkor korxonalariga 1 milliarddan 3 milliard so‘mgacha pul mukofoti ajratiladi. Ushbu mablag‘ning yarmi tizimni rivojlantirishga hissa qo‘shgan pedagog xodimlarni moddiy rag‘batlantirishga yo‘naltiriladi.
