O‘zbekistonda boshpanasiz shaxslar ijtimoiy markazlarga endi sud qarorisiz joylashtiriladi
O‘zbekistonda muayyan yashash joyiga ega bo‘lmagan shaxslar vaqtinchalik boshpana va ijtimoiy tiklanish markazlariga sud qarorisiz, o‘z murojaati yoki mas’ullar tavsiyasiga ko‘ra joylashtiriladi. Bu haqda Prezident Shavkat Mirziyoyevga muayyan yashash joyiga ega bo‘lmagan shaxslarni qo‘llab-quvvatlash tizimini takomillashtirish bo‘yicha taqdimotda so‘z boradi.
Unga ko‘ra, amaldagi reabilitatsiya muassasalari vaqtinchalik boshpana va ijtimoiy tiklanish markazlariga aylantiriladi.
Yangi tartibga asosan, boshpanasiz shaxslar ushbu markazlarga o‘z murojaati, “mahalla yettiligi” tomonidan o‘tkazilgan o‘rganish natijalari yoki ijtimoiy xodim hamda profilaktika inspektori ko‘magida joylashtiriladi. Bu ularni markazlarga joylashtirish uchun sud qarori talab etilmasligini anglatadi.
Har bir shaxs uchun individual reabilitatsiya rejasi ishlab chiqiladi. Unga muvofiq hujjatlarni tiklash, tibbiy va ijtimoiy xizmatlar ko‘rsatish, kasbga o‘qitish hamda ishga joylashtirish bo‘yicha chora-tadbirlar amalga oshiriladi.
Shuningdek, markazlarda bandlikni qo‘llab-quvvatlash bo‘linmalari tashkil etilib, tadbirkorlarga bo‘sh joylar imtiyozli shartlarda ijaraga beriladi. Boshpanasiz shaxslarga kasb-hunar o‘rganish uchun vaucher ajratish, ularni ijtimoiy ehtiyojmand toifalar ro‘yxatiga kiritish va ular uchun ish o‘rinlarini zaxiralash ham rejalashtirilgan.
Bundan tashqari, nodavlat tashkilotlarga davlat ijtimoiy buyurtmalarini joylashtirish orqali boshpanasiz shaxslarni vaqtinchalik boshpana, issiq ovqat va kiyim-bosh bilan ta’minlash qamrovi kengaytiriladi.
Hozirda respublikada jami 726 o‘ringa mo‘ljallangan 11 ta reabilitatsiya markazi faoliyat ko‘rsatmoqda. 2026-yilning birinchi yarmida ushbu markazlarga 1,1 ming nafar shaxs joylashtirilgan.
