O‘zbekistonda Apple Pay va Google Pay’ni ishga tushirishga tayyorgarlik boshlandi
Markaziy bankning Spot.uz'ga bergan ma’lumotlariga ko‘ra, hozirda Apple Pay va Google Pay platformalarining O‘zbekiston to‘lov tizimiga integratsiyasi uchun zarur texnik ishlar olib borilmoqda.
Ma'lum qilindiki, Apple va Google kompaniyalari bilan rasmiy muzokaralar sentabr oyida bo‘lib o‘tishi rejalashtirilgan. Ushbu uchrashuvlarda xizmatlarni joriy etish bo‘yicha tayyorgarlik masalalari muhokama qilinadi.
Mazkur jarayon uchun muhim qadamlardan biri shaxsiy ma’lumotlarni saqlash bo‘yicha qonunchilikdagi o‘zgarishlar bo‘ldi. Prezident Shavkat Mirziyoyev tomonidan imzolangan qonun asosida ayrim ma’lumotlarni faqat O‘zbekiston hududidagi serverlarda saqlash talabi bekor qilindi. Bu o‘zgarishlar xalqaro to‘lov platformalarini ishga tushirish uchun zarur huquqiy sharoit yaratadi. Biroq Apple Pay va Google Pay’ning O‘zbekistonda faoliyat boshlashi kompaniyalarning o‘z tijoriy qarorlariga ham bog‘liq. Apple Pay va Google Pay’ni O‘zbekistonda ishga tushirish masalasi bir necha yildan beri muhokama qilinib kelmoqda.
