Oʻzbekistonda anomal issiq sababli koʻchalar va yashil hududlarni sugʻorish ishlari kuchaytirildi
Ekologiya va iqlim oʻzgarishi milliy qoʻmitasi maʼlum qilishicha, hududiy boshqarmalar mahalliy hokimliklar bilan hamkorlikda anomal issiq oqibatlarini yumshatish boʻyicha kompleks choralarni koʻrmoqda. Namlik kamroq bugʻlanishi uchun daraxt va butalar asosan tongda, kechqurun va tunda sugʻorilmoqda, shuningdek, maxsus texnikalar yordamida shahar koʻchalariga suv sepilmoqda.
Xususan, Buxoro viloyatining yashil hududlarida sugʻorish kuchaytirilib, favvoralar ishga tushirildi, Konimex tumanida esa changni kamaytirish uchun yoʻllarga suv sepilmoqda. Qashqadaryo viloyatida yashillikni asrash uchun tungi sugʻorish ishlari yoʻlga qoʻyildi. Andijon, Xonobod va Namangan shaharlarida maxsus transportlar yordamida koʻchalar sovitilmoqda.
Navoiyda gulzor va daraxtlar muntazam sugʻorilayotgan boʻlsa, Surxondaryo viloyati va Termiz shahrida tasdiqlangan grafik asosida koʻchalar hamda yashil maydonlar namlantirilib, baʼzi hududlarda zamonaviy sugʻorish tizimlari joriy etildi. Qoʻmita fuqarolarni ham ushbu jazirama kunlarda daraxtlarni sugʻorish orqali ekologik barqarorlikka hissa qoʻshishga chaqirdi.
