O‘zbekistonda 41 ming nafardan ortiq bitiruvchi ishsiz qolmoqda
Tahlillar respublikadagi 170 ta oliy ta’lim muassasasining 249 mingdan ortiq bitiruvchisi o‘rtasida o‘tkazildi. Izlanishlar natijasida 206 ming 951 nafar mutaxassis rasman ish bilan ta’minlangani aniqlandi. Shu bilan birga, 41 mingga yaqin bitiruvchi hozircha ishsiz ekani, 19 mingdan ziyodi ta’limni davom ettirayotgani hamda 48 mingga yaqini bola parvarishlash ta’tilida ekani qayd etildi. Hisobotda ta’kidlanishicha, harbiy xizmatdagilar va ta’limni davom ettirayotganlar umumiy bandlik ko‘rsatkichini hisoblashda inobatga olinmagan.
Ma’lumotlarga ko‘ra, oliygohni bitirgan yoshlar o‘rtacha 3 oy-u 5 kun ichida o‘ziga ish topishga muvaffaq bo‘lmoqda. Bu ko‘rsatkich mamlakatda bitiruvchilarning mehnat bozoriga moslashuvi va talabgorligi nisbatan yuqori ekanini ko‘rsatadi.
Mamlakat bo‘yicha yosh mutaxassislarning o‘rtacha oylik maoshi 4,9 million so‘mni tashkil etmoqda. Hududlar kesimida daromad darajasi turlicha bo‘lib, eng yuqori maosh ko‘rsatkichi Toshkent shahriga to‘g‘ri kelmoqda – poytaxtda bitiruvchilar o‘rtacha 6,6 million so‘m maosh olmoqda.
