O‘zbekistonda 310 ming aholi xonadoniga ilk bor toza ichimlik suvi kirib boradi
Prezident Shavkat Mirziyoyev ichimlik va oqova suv xizmatlarini yaxshilash bo‘yicha taqdimot bilan tanishdi. Unda 513 ta mahallaga markazlashgan suv tarmog‘ini olib borish va 3 mingta mahallada ta’minot sifatini oshirish vazifasi belgilandi.
Aholiga qulaylik yaratish maqsadida 232 mingta ko‘cha suv kolonkasi o‘rniga tarmoqlar bevosita xonadonlargacha tortiladi. Yil yakuniga qadar $600 million evaziga 1,6 ming km ichimlik suvi va 387 km kanalizatsiya tarmog‘i, shuningdek, 109 ta suv va oqova inshooti barpo etiladi. Natijada 107 ta mahalladagi 310 ming aholi ilk bor markazlashgan ichimlik suvi bilan ta’minlanadi, 453 ta mahalladagi 2,5 million aholining suv ta’minoti yaxshilanadi.
Shuningdek, Qashqadaryoda $217 millionlik “Hisorak” suv omboridan tarmoq tortish loyihasi jadallashtiriladi. Bu orqali Qarshi shahri hamda Qamashi, G‘uzor va Qarshi tumanlaridagi 1,1 million aholining suv ta’minoti yaxshilanadi. Mutasaddilarga loyihaning texnik-iqtisodiy asoslarini tezroq yakunlab, moliyalashtirish manbasini hal etish topshirildi.
