O‘zbekistonda 2050-yilgacha mo‘ljallangan milliy demografik strategiya ishlab chiqiladi va prognozlash tizimi yaratiladi
Ushbu uzoq muddatli strategiyadan ko‘zlangan asosiy maqsad mamlakatning o‘sib borayotgan yosh aholisi yaratayotgan imkoniyatlardan samarali foydalanish va inson kapitaliga to‘g‘ri sarmoya kiritishdan iborat. Mutaxassislarning ta’kidlashicha, tez sur’atlar bilan ko‘payib borayotgan resurslarni demografik dividendga – ya’ni iqtisodiy o‘sish va taraqqiyot drayveriga aylantirish uchun birinchi navbatda ayollar hamda bolalarning salomatligi, ta’limi va xavfsizligini ta’minlash talab etiladi.
Anjumanda taqdim etilgan tahlillarga ko‘ra, BMT vakillari yosh va dinamik aholi o‘sishi iqtisodiyot uchun ulkan imkoniyat ekanini, biroq bu imkoniyat faqat sog‘liqni saqlash va ta’lim sifatini oshirish orqaligina real natija berishini qayd etdi. Shu munosabat bilan demografik jarayonlarni oldindan baholash va to‘g‘ri rejalashtirish imkonini beruvchi zamonaviy prognozlash tizimi yaratilishi belgilandi.
Tadbirlar yakunida kelajakni baholashda faqatgina aholining umumiy soni ko‘rsatkichlariga tayanib qolmasdan, har bir fuqaroning bilim olishi, sog‘lig‘i hamda shaxsiy rivojlanish imkoniyatlariga asosiy e’tiborni qaratish zarurligi alohida uqtirildi.
