Oʻzbekistonda 2030-yilgacha 1,5 ming nafar yangi avlod rahbarlari zaxirasi shakllantiriladi
Prezident tanishgan taqdimotga koʻra, sunʼiy intellekt yordamida iqtisodiyot tarmoqlari tahlil qilinganda energetika, “yashil” texnologiyalar, qurilish, qishloq va suv xoʻjaligi, raqamlashtirish hamda xizmat koʻrsatish kabi 50 dan ortiq zamonaviy yoʻnalishda boshqaruv kadrlariga ehtiyoj borligi aniqlandi.
Yangi tizimda istiqbolli rahbarlar bilim, kasbiy tajriba, psixologik xususiyat, strategik fikrlash va liderlik boʻyicha 100 ballik mezon asosida baholanadi. Sunʼiy intellekt nomzodlarning portfoliosini tahlil qilib, ular uchun shaxsiy rivojlanish rejalarini ishlab chiqadi.
Ushbu baholash tizimi dastlab qishloq xoʻjaligi, oliy taʼlim va qurilish sohalarida sinovdan oʻtkaziladi. Rejaga koʻra, har ikki yilda 500 nafardan istiqbolli boshqaruvchi saralanib, 2030-yilgacha 1,5 ming nafar mutaxassisdan iborat milliy rahbar kadrlar zaxirasi shakllantiriladi. Shuningdek, agrar soha, sogʻliqni saqlash, tadbirkorlik, sud-huquq, taʼlim, AKT va sunʼiy intellekt yoʻnalishlarini qamrab oluvchi "top-100" tanlovi oʻtkaziladi. Unda test, kompleks baholash va suhbatdan muvaffaqiyatli oʻtgan gʻoliblar maxsus kurslarda oʻqitilib, milliy kadrlar zaxirasiga kiritiladi.
