O‘zbekistonda 15-oktabrdan 30-noyabrgacha barcha biznes subyektlari ro‘yxatga olinadi
O‘zbekistonda o‘tkazilgan aholi va qishloq xo‘jaligini ro‘yxatga olishning dastlabki natijalari ma’lum qilindi. Unga ko‘ra, mamlakatning doimiy aholisi 39 million 47 ming nafarni tashkil etgan. Prezident Shavkat Mirziyoyevga aholi va qishloq xo‘jaligini ro‘yxatga olish yakunlari hamda milliy statistika tizimini rivojlantirish bo‘yicha takliflar taqdim etildi.
Ro‘yxatga olish jarayonida amaldagi hisobda aks etmagan 810,6 ming nafar aholining yashash manzili va ijtimoiy maqomiga aniqlik kiritilgan.
Hududlar kesimida ham sezilarli tafovutlar aniqlangan. Jumladan, amaldagi ma’lumotlarga nisbatan Jizzax viloyati aholisi 2,7 foiz, Namangan viloyati 1,3 foiz, Surxondaryo 0,9 foiz, Qashqadaryo esa 0,7 foiz kam ekani ma’lum bo‘lgan.
Shu bilan birga, Toshkent tumani aholisi avvalgi hisobga nisbatan 1,6 barobar ko‘p, Andijon shahri aholisi esa 15,8 foiz kam ekani aniqlangan.
Qishloq xo‘jaligini ro‘yxatga olish natijasida avvalgi hisoblarda aks etmagan 985,5 ming gektar yerning chegarasi va toifasi aniqlashtirilgan.
Shundan:
- 789,5 ming gektar — ekin yerlari;
- 14,1 ming gektar — issiqxonalar;
- 75,3 ming gektar — bog‘lar;
- 21,4 ming gektar — tokzorlar;
- 85 ming gektar — baliqchilik havzalari.
Ro‘yxatga olish jarayonlarining raqamlashtirilishi hisobiga xarajatlar aholi jon boshiga 1,5 ming so‘mdan oshmagan. Internet orqali ro‘yxatga olish qamrovi esa 82,3 foizni tashkil etgan. Barcha jarayonlar 15 kunda yakunlangan. Ta’kidlanishicha, O‘zbekiston ro‘yxatga olish tezligi bo‘yicha dunyoda ikkinchi o‘rinni egallagan.
Taqdimotda iqtisodiy faoliyatni to‘liq statistik hisobga olish masalasiga ham e’tibor qaratilgan.
Bugungi kunda kuzatilmaydigan iqtisodiyot ulushi 23 foiz, ya’ni 246 trillion so‘mni tashkil etayotgani qayd etilgan. Qishloq xo‘jaligida esa umumiy aylanmaning 60 foizi ushbu sektor hissasiga to‘g‘ri kelmoqda.
Mehnat bilan band bo‘lgan 15,2 million aholining 6,5 million nafari, ya’ni 42 foizining daromadlari rasmiy hisobda to‘liq aks etmayapti.
Shu munosabat bilan 2026-yil 15-oktabrdan 30-noyabrgacha mamlakatdagi barcha iqtisodiy birliklarni xatlovdan o‘tkazish va biznesni ro‘yxatga olish tadbirini o‘tkazish taklifi ma’qullangan.
Bundan tashqari, 2027-yil 1-iyulgacha Milliy ma’lumotlar platformasini ishga tushirish, statistik ma’lumotlarni sun’iy intellekt tizimlari o‘qiy oladigan formatlarda e’lon qilish rejalashtirilmoqda. Davlat rahbari aniq, tezkor va ishonchli statistika davlat siyosatini belgilash hamda hudud va tarmoqlarni rivojlantirish bo‘yicha to‘g‘ri qarorlar qabul qilishning muhim sharti ekanini ta’kidladi.
