O‘zbekiston yetti oyda salkam 350 million dollarlik shakar sotib oldi
Bojxona qo‘mitasi ma’lum qiladiki, dastlabki yetti oy ichida xorijdan jami qiymati 348,1 million dollarga teng bo‘lgan 505,4 ming tonna shakar olib kelingan. Bunda bir tonna mahsulotning o‘rtacha import narxi 688 dollarni tashkil etgan.
Taqqoslash uchun, 2025-yilning mos davrida 187,2 ming tonna shakar sotib olingan va tonnasi 619 dollardan tushgan edi. Bu boradagi xarajatlar va narx ko‘rsatkichlari bir yil ichida 11 foizga qimmatlashganini ko‘rsatmoqda.
Joriy yilgi import hajmi o‘tgan yilning mos davriga nisbatan 2,7 baravarga oshgan va deyarli butun 2025-yil davomida olib kelingan ko‘rsatkichga (516 ming tonna) tenglashgan. 2024-yil davomida esa umumiy shakar importi bor-yo‘g‘i 275,2 ming tonnani tashkil etgan edi. Joriy yilda eng ko‘p shakar iyul oyida (99,2 ming tonna), eng kami esa yanvarda (51,5 ming tonna) mamlakatga olib kirilgan.
Tashqi bozordan keltirilayotgan mahsulot hajmi keskin oshganiga qaramay, ichki bozorda narxlar barqarorligicha qolmoqda. Statistika agentligi ma’lumotlariga ko‘ra, 2026-yilning iyul oyida O‘zbekistonda shakar narxi o‘tgan yilning mos davri bilan solishtirganda 6,3 foizga arzonlashgan.
