O‘zbekiston xalq shoiri Sharifa Salimova vafot etdi

Marhumaning janozasi bugun asr namozidan so‘ng Chig‘atoy masjidida o‘qiladi.

Sharifa Salimova 1951-yilning 30-dekabrda Toshkent viloyatining Parkent tumanida tug‘ilgan. 1958–1968-yillarda maktabda tahsil olgan. Uning ilk she’rlari o‘sha davrda tuman nashri – “Sur’at” gazetasida chop etilgan.

1969–1974-yillarda Toshkent davlat universitetining jurnalistika fakultetida o‘qigan. Oliy ta’limni tamomlagach, mehnat faoliyatini O‘zbekiston televideniye va radioeshittirish qo‘mitasining “Vatandosh” radiostansiyasida boshlagan. Bu yerda kichik muharrirdan bo‘lim boshlig‘igacha bo‘lgan lavozimlarda ishlagan.

1989–1994-yillarda “Saodat” jurnali hamda “O‘zbekiston adabiyoti va san’ati” haftaligida bo‘lim mudiri sifatida faoliyat yuritgan. Aynan shu davrda uning jamiyatdagi dolzarb masalalarni yoritishga bag‘ishlangan publitsistik maqolalari muntazam e’lon qilinib borgan.

Sharifa Salimova faoliyati davomida bir qator mas’ul davlat lavozimlarida ham ishlagan. U 1998–1999-yillarda O‘zbekiston Prezidenti devonining ijtimoiy-siyosiy masalalar bo‘yicha, 1999–2000-yillarda esa tashkiliy-kadrlar siyosati masalalari bo‘yicha yetakchi konsultanti lavozimida faoliyat yuritgan. Shuningdek, 2000–2005-yillarda Oliy Majlisning Oila va ayollar muammolari komissiyasiga rahbarlik qilgan hamda deputat bo‘lgan. 2005–2009-yillarda esa Oliy Majlis Qonunchilik palatasining Mehnat va ijtimoiy masalalar qo‘mitasi a’zosi sifatida parlament faoliyatida ishtirok etgan.

Shoiraning dastlabki she’rlari 1970-yillarning oxiri va 1980-yillarda kitob holida nashr etilib, ular orasida “Hayot zavqi” (1978) va “Mening bahorim” (1987) to‘plamlari alohida o‘rin tutadi. Uning Alisher Navoiy tavalludining 550 yilligiga bag‘ishlab yozilgan “Xizr bulog‘i” (1996) dostoni feodal davr ayollarining murakkab taqdirini yoritadi. “Tongga qasam” (2002) publitsistik maqolalar to‘plamida esa jamiyatning dolzarb muammolari qalamga olingan.

Sharifa Salimovaning adabiyot va madaniyat rivojiga qo‘shgan hissasi davlat tomonidan ham e’tirof etilgan. U 1994-yilda “O‘zbekiston Respublikasida xizmat ko‘rsatgan madaniyat xodimi” faxriy unvoni bilan taqdirlangan, 2018-yilda esa “Mehnat shuhrati” ordeni bilan mukofotlangan.

Ijodkor nafaqat original asarlar muallifi, balki tarjimon sifatida ham samarali faoliyat olib borgan. U rus, qozoq va qirg‘iz shoiralari ijodidan tarjimalar qilgan, shuningdek, nemis islomshunosi va shoiri Hadayatulloh Hyubsh she’rlarini o‘zbek tiliga tarjima qilib, ularni “Oh, atirgul” nomi bilan nashrga tayyorlagan.

PORTAL24.uz marhumaning oila a’zolari va yaqinlariga chuqur hamdardlik bildiradi.