O‘zbekiston va AQSh yadro xavfsizligi sohasida hamkorlik bo‘yicha rasmiy kelishuvga erishdi
Hujjat O‘zbekiston delegatsiyasining Atom energiyasi bo‘yicha xalqaro agentlik (AEXA) 70-Bosh konferensiyasidagi ishtiroki doirasida rasmiylashtirildi. Hamkorlik kelishuvini O‘zbekiston tomonidan Sanoat, radiatsiya va yadro xavfsizligi qo‘mitasi raisi A. Rafiqov hamda AQSh Yadroviy tartibga solish komissiyasi raisi Ho K. Nieh imzoladi.
Mazkur memorandum radiatsiya va yadro xavfsizligi yo‘nalishida litsenziyalash hamda inspeksiya faoliyatini tartibga solish, sohadagi normativ-huquqiy bazani takomillashtirish, shuningdek, ehtimoliy avariya holatlarining oldini olish va unga tayyorgarlik ko‘rish bo‘yicha birgalikda chora-tadbirlar ishlab chiqishni ko‘zda tutadi.
Shu bilan birga, ikki mamlakat vakillari soha mutaxassislarining malakasini oshirish, o‘zaro axborot hamda amaliy tajriba almashish ko‘lamini kengaytirish borasida ham bir qator muhim kelishuvlarga erishdilar.
