O‘zbekiston Markaziy Osiyoda birinchi bo‘lib Braziliyaning zamonaviy harbiy samolyotini qabul qildi
Gavian-Peyshotu shahridagi zavodda bo‘lib o‘tgan tantanali marosimda ikki tomonlama tuzilgan shartnomaga muvofiq birinchi bort topshirildi. Mazkur kelishuv nafaqat texnikani yetkazib berish, balki harbiy kadrlarni tayyorlash hamda ularga doimiy texnik xizmat ko‘rsatishni ham o‘z ichiga oladi. O‘zbekiston jami ikkita shunday samolyotga buyurtma bergan bo‘lib, ular asosan og‘ir yuklarni tashish, qutqaruv hamda gumanitar operatsiyalarni bajarishga mo‘ljallangan.
Ushbu ko‘p maqsadli havo kemasi 26 tonnagacha bo‘lgan harbiy va fuqarolik yuklarini soatiga 870 kilometr tezlikda tashish quvvatiga ega. Samolyot hatto maxsus tayyorlanmagan yoki vaqtinchalik uchish-qo‘nish yo‘laklaridan ham muammosiz foydalana oladi va tibbiy evakuatsiya hamda yong‘inlarni o‘chirish kabi murakkab vazifalarni bajarishda yuqori samaradorlik ko‘rsatadi.
Mamlakat harbiy rahbariyati ushbu zamonaviy havo kemasining xarid qilinishini milliy aviatsiyani yangilash va uning jangovar hamda logistik imkoniyatlarini kengaytirishdagi muhim qadam sifatida baholamoqda. So‘nggi yillarda havo hujumidan mudofaa tizimlari va aviatsiya parkini eng so‘nggi rusumdagi texnikalar va uchuvchisiz apparatlar bilan qurollantirish jarayoni izchil davom ettirilmoqda.
