O‘zbekiston iyulda 1,3 milliard dollarlik oltin sotdi. Eksport tushumi keskin qisqardi
Ushbu ko‘rsatkich joriy yildagi ikkinchi yirik oltin sotuvi bo‘ldi – bundan avval aprel oyida 1,5 milliard dollarlik qimmatbaho metall eksport qilingan edi. Joriy yilning dastlabki yetti oyida jami oltin eksporti 2,8 milliard dollardan oshdi, ammo bu o‘tgan yilning mos davridagi ko‘rsatkichdan (7,6 milliard dollar) 2,7 barobarga kamdir.
Oltin sotuvining keskin qisqarishi mamlakatning umumiy eksport hajmiga ham salbiy ta’sir ko‘rsatdi. Yanvar-iyul oylarida respublikaning jami eksport hajmi 19,9 milliard dollarni tashkil etib, o‘tgan yilga nisbatan 3,6 foizga kamaydi.
So‘nggi ma’lumotlarga ko‘ra, ilgari umumiy eksport tushumlarining uchdan bir qismini tashkil etgan oltinning ulushi joriy yilda 14,1 foizgacha tushib ketdi. Taqqoslash uchun, o‘tgan yilning mos davrida ushbu qimmatbaho metallning jami eksportdagi ulushi 36,7 foizni tashkil etgan edi.
