O‘zbekiston banklarida qaytarilmayotgan kreditlar hajmi 27 foizga oshdi
Markaziy bank ma’lumotlariga ko‘ra, olti oy davomida jamiy kredit portfeli 6,4 foizga oshib, 643 trillion so‘mni tashkil etgan bo‘lsa, muammoli qarzdorliklar ulushi 2,99 foizdan 3,57 foizga ko‘tarildi.
Tizimdagi NPL’ning asosiy qismi – qariyb 72 foizi davlat ulushiga ega tijorat banklari hissasiga to‘g‘ri kelmoqda. Ulardagi qaytarilmayotgan kreditlar hajmi 12,8 trillion so‘mdan 16,4 trillion so‘mga oshgan. Xususiy va xorijiy banklarda esa bu ko‘rsatkich nisbatan barqaror saqlanib, 2,62 foizdan 2,95 foizga yetgan.
Nisbiy ko‘rsatkich bo‘yicha eng keskin yomonlashuv TBC Bank’da qayd etildi – u yerda NPL ulushi 5,71 foizdan 12,12 foizga sakrab, tizimdagi eng yuqori darajani egalladi. Mikrokreditbankda esa muammoli qarzdorlik hajmi deyarli 900 milliard so‘mga ko‘payib, ulushi 7,86 foizga yetdi.
Umumiy o‘sish fonga qaramay, ayrim banklar kredit portfeli sifatini yaxshilashga erishdi. Eng sezirarli ijobiy natijani Poytaxt bank ko‘rsatib, NPL ulushini 24,40 foizdan 7,32 foizga tushirdi. Shuningdek, Kapitalbank hamda Ipoteka-bank muammoli kreditlar hajmini mos ravishda 200 mlrd va 163 mlrd so‘mga kamaytirdi.
KDB Bank Uzbekistan hamda Octobank’da NPL ko‘rsatkichi mutlaqo 0 foiz darajasida saqlanib qolgan bo‘lsa, Uzumbank (0,01%), ApexBank (0,04%) va Open Bank (0,35%) eng xavfsiz portfelga ega banklar bo‘ldi.
