Ortiqxo‘jayev Rossiyadagi 10 ming o‘zbekistonlikni ortga qaytarib, ish bilan ta’minlamoqchi
Xorazm viloyatida davlat rahbari va tadbirkorlar o‘rtasida o‘tkazilgan muloqotda biznesmen Jahongir Ortiqxo‘jayev Tataristonda dronlar hujumi oqibatida 8 nafar o‘zbekistonlik halok bo‘lganiga to‘xtalib, xorijdagi vatandoshlarni qaytarishda biznes jamiyati ham mas’uliyatni o‘z zimmasiga olishi lozimligini bildirgan.
“AKFA Holding kompaniyasi xorijdagi 10 ming nafar vatandoshimizni ish bilan ta’minlashga tayyor. Agar ruxsat bersangiz, ertadanoq alohida koll-markaz tashkil etib, Rossiyadan qaytmoqchi va O‘zbekistonda ishlamoqchi bo‘lgan vatandoshlarimizni ishga joylashtirishni boshlaymiz”, dedi Ortiqxo‘jayev.
Shuningdek, tadbirkor Discovery Invest kompaniyasi AQShlik hamkorlar bilan birgalikda Meksika, Saudiya Arabistoni hamda Albaniyadagi yirik loyihalarda ishtirok etayotganini va bu orqali ham minglab hamyurtlarimiz uchun xorijda xavfsiz ish o‘rinlari yaratilishini qo‘shimcha qilgan. U mamlakatdagi 600 mingga yaqin biznes subyekti ham har biri kamida ikkitadan vatandoshimizni ishga olsa, 1 milliondan ortiq insonni band qilish mumkinligini ilgari surdi.
Prezident Shavkat Mirziyoyev ushbu takliflarni to‘liq ma’qullab, balandparvoz gaplar bilan cheklanmasdan amaliy harakatga o‘tish zarurligini ta’kidladi hamda mas’ullarga aniq vazifalar yuklagan.
“Xorijdagi fuqarolarimizga kelsak – Tataristonda sodir bo‘lgan voqea meni qanchalik tashvishga solayotganini bilasizlar. Bu yerda balandparvoz gaplar bilan cheklanib qolmasdan, harakat qilish kerak. Barcha takliflaring bo‘yicha, shu jumladan 10 ming vatandoshimizni qaytarish bo‘yicha platforma yaratgin va o‘n kun ichida menga taklif kiritgin”, degan davlat rahbari.
Avvalroq Tataristondagi dronlar hujumida 8 nafar o‘zbekistonlik halok bo‘lgani haqida xabar berilgan edi.
