Olmaota-Toshkent poyezdida ilk bor “Ayollar vagoni” xizmati yo‘lga qo‘yiladi
Ushbu qaror ikki davlat o‘rtasidagi yo‘lovchi oqimining ortishi va xizmatga bo‘lgan talabning oshgani sababli qabul qilingan. Mazkur yo‘nalishning qo‘shilishi bilan Qozog‘istonda ayollar vagoni xizmati ko‘rsatiladigan poyezdlar soni 14 taga yetadi. Ma’lumot uchun, ushbu loyiha yo‘lga qo‘yilganidan buyon undan 946 mingdan ortiq yo‘lovchi foydalanishga ulgurgan.
Loyiha tartibiga ko‘ra, vagon uchun chiptalar faqat ayollar uchun sotiladi hamda ularga poyezd ichida faqat ayol kuzatuvchilar xizmat ko‘rsatadi. Istisno tariqasida, yetti yoshgacha bo‘lgan o‘g‘il bolalarning katta yoshli ayol hamrohligida ushbu vagonda harakatlanishiga ruxsat beriladi.
Chiptalarni rasmiy platformalar va kassalarda “JN” belgisi orqali ajratib olish va xarid qilish mumkin.
Ma’lumot o‘rnida, Olmaota-Toshkent poyezdi har kuni muntazam ravishda qatnaydi. Poyezd Olmaotadan soat 19:05 da yo‘lga chiqib, ertasi kuni Toshkentga 12:53 da yetib keladi. Poytaxtimizdan esa soat 14:41 da jo‘nab ketib, Olmaotaga 08:51 da yetib boradi.
