Oliy ta’limda davlat aralashuvi keskin qisqartirilib, oliygohlarga keng mustaqillik beriladi
Prezident matbuot kotibi Sherzod Asadov ta’kidlashicha, qaysi oliygoh sifatli ta’lim berayotganini bundan buyon davlat ma’muriyatchiligi emas, balki erkin raqobat va bozor talabi belgilab beradi.
Qaytadan tashkil etilayotgan Ta’lim va ilm-fan vazirligi bog‘cha, maktab, professional hamda oliy ta’lim muassasalarining operatsion jarayonlarini muvofiqlashtiradi. Vazirlik zimmasiga ta’lim faoliyatiga qo‘yiladigan mezonlarni belgilash, litsenziyalash hamda akkreditatsiyadan o‘tkazish vazifalari yuklatiladi.
Shuningdek, Ta’lim sifatini ta’minlash milliy agentligi o‘quv dasturlari va metodik materiallarni ishlab chiquvchi ilmiy laboratoriya sifati faoliyat yuritadi. Agentlik ishlab chiqilgan metodikalarni amaliyotga joriy etadi, ta’lim samaradorligini monitoring qiladi hamda aniqlangan kamchiliklar asosida tizimni muntazam takomillashtirib boradi.
Yangi vazirlikning yakuniy tuzilmasi, ish jarayonlari va islohotlarning umumiy strategiyasini ishlab chiqish uchun Prezident Administratsiyasi huzurida alohida ishchi guruh faoliyat boshlaydi.
