“O‘ldirishim kerak edi”. Qarshida erkak xotinini o‘lasi qilib do‘pposlab, o‘lim bilan tahdid qilgani aytilmoqda
Ijtimoiy tarmoqlarda Qashqadaryo viloyati qarshi shahrida ayol eri tomonidan do‘pposlangani haqida xabarlar tarqaldi. Tarqalgan video murojaatda zo‘ravonlik oqibatida ayolning bosh qismi yorilgani, yuz-ko‘zlari ko‘karib, qattiq jarohat olgani aks etgan.
Shuningdek, murojaatda uning hamkasblari bu holat oldin ham sodir bo‘lgani, o‘shanda homilasidan ayrilganini ma’lum qilgan. Qolaversa, ayolning onasi erkak bilan bog‘langanida, “o‘lmay qolibdi, o‘ldirishim kerak edi”, deya tahdid qilgani qayd etilgan.
Holat yuzasidan tegishli organlarga murojaat qilinganida ekspertiza o‘tkazilishi bildirilgan. Biroq jarayon ayol shifoxonadan chiqqach o‘tkazilishi ma’lum qilingan.
Esingizda bo‘lsa, joriy yilning 9-mart kuni prezident Shavkat Mirziyoyev Xalqaro xotin-qizlar kuni munosabati bilan o‘tkazilgan bayram tadbirda O‘zbekistonda endi xotin-qizlar va bolalarga nisbatan har qanday zo‘ravonlik va tazyiq holatlariga qarshi qattiq tizim asosida kurash olib borilishi haqida aytgan edi. Tadbirda ayollarga tazyiq o‘tkazgan, yoshlarga qo‘l ko’targan endi O‘zbekistondan yo ko‘chib ketadi yo qonun asosida yashashga majbur bo‘ladi, degan edi.
Holat yuzasidan Qashqadaryo viloyati IIB yoki Bosh prokuratura hozircha rasmiy munosabat bildirmadi. Jabrlanuvchi ayolning yaqinlari voqea yuzasidan qonuniy chora ko‘rilishini so‘ramoqda.
