“Odamlar dod deganicha bor”. Saida Mirziyoyeva poytaxtdagi noqonuniy qurilishlar bo‘yicha qat’iy ogohlantirish berdi
Saida Mirziyoyeva Toshkentning “Lolazor” mahallasidagi holatni shaxsan borib ko‘rdi. U yerda aholi o‘stirgan daraxtlar qo‘porib tashlangani hamda bolalar maydonchasi o‘rniga biznes markazi qurish rejalashtirilgani aniqlangan.
“Aholi foydalanishi uchun ajratilgan shahar hududlari ofis yoki turar joy binolarini qurishga mo‘ljallanmagan, ular o‘z vazifasiga ko‘ra xizmat qilishi zarur. Odamlar dod deganicha bor – qurilishlar tufayli poytaxtdagi umumiy hovlilar, o‘yin va sport maydonchalari tag-tugi bilan yo‘q qilib yuborilyapti”, degan u.
U poytaxtda qurilishlar sabab umumiy hovli va sport maydonchalari yo‘qolib borayotganini hamda jamoat hududlarida bino qurish mumkin emasligini ta’kidladi.
Endilikda Bosh prokuratura Toshkent bo‘ylab barcha shunday obyektlarni to‘liq inventarizatsiyadan o‘tkazadi. Qurilish ruxsatnomalarining qonuniyligi va shaharsozlik mezonlari qayta tekshirilib, qonunbuzarlikka yo‘l qo‘ygan mas’ullarga, kerak bo‘lsa, ozodlikdan mahrum etishgacha bo‘lgan murosasiz choralar ko‘riladi.
