Namanganning sobiq hokimi Anvarjon Otaxo‘jayev 11 yilga ozodlikdan mahrum qilindi
Jinoyat ishlari bo‘yicha O‘zbekiston tuman sudi Namangan shahrining sobiq hokimi Anvarjon Otaxo‘jayevga nisbatan hukm chiqardi. U bir qator mansab va mulkiy jinoyatlarni sodir etganlikda aybdor deb topilib, 11 yil muddatga ozodlikdan mahrum qilindi.
Sud hukmiga ko‘ra, 1972-yilda tug‘ilgan, Namangan shahri hokimi lavozimida ishlagan Anvarjon Otaxo‘jayev Jinoyat kodeksining o‘zlashtirish yoki rastrata yo‘li bilan talon-toroj qilish, firibgarlik, hokimiyat yoki mansab vakolatini suiiste’mol qilish, hokimiyat yoki mansab vakolatidan chetga chiqish, mansabga sovuqqonlik bilan qarash, mansab soxtakorligi hamda pora olishga oid moddalarida nazarda tutilgan jinoyatlarni sodir etganlikda aybdor deb topildi.
Sud unga Jinoyat kodeksining 59-moddasi 3-qismi asosida 3 yil muddatga mansabdorlik va moddiy javobgarlik yuklatilgan lavozimlarda ishlash huquqidan mahrum qilgan holda, 11 yil muddatga ozodlikdan mahrum etish jazosini tayinladi.
Shuningdek, mazkur jinoyat ishi bo‘yicha yana 3 nafar sudlanuvchiga 7 yildan 10,5 yilgacha ozodlikdan mahrum qilish, 2 nafariga 2 yil 6 oy muddatga axloq tuzatish ishlari, yana bir nafar sudlanuvchiga esa 3 yil muddatga ozodlikni cheklash jazosi tayinlandi.
