Namanganda maktab va bog‘chalar uchun ajratilgan 1 mlrd so‘mlik isitish tizimi mablag‘i o‘zlashtirildi
Bosh prokuratura huzuridagi Iqtisodiy jinoyatlarga qarshi kurashish departamenti tomonidan o‘tkazilgan tergovga qadar tekshiruvda tuman Maktabgacha va maktab ta’limi bo‘limi (MMTB) mas’ullari sodir etgan noqonuniy harakatlar aniqlandi. Soha mas’ullari o‘zaro til biriktirgan holda ta’lim muassasalari uchun mo‘ljallangan mablag‘larni o‘zlashtirish yo‘lini tutgan.
Hujjatlarga ko‘ra, maktab va bog‘chalarga “ABS” rusumli isitish qozonlarini yetkazib berish bo‘yicha shartnoma imzolangan. Biroq amalda ushbu sifatli moslamalar o‘rniga boshqa – “LES” rusumli isitish qozonlari xarid qilingan va narxlardagi tafovut evaziga 1 milliard so‘m byudjet mablag‘i o‘zlashtirish hamda rastrata yo‘li bilan talon-toroj etilgan.
Mazkur holat yuzasidan Davlatobod tumani MMTB mas’ul shaxslari va ularning sheriklariga nisbatan Jinoyat kodeksining 167-moddasi (O‘zlashtirish yoki rastrata yo‘li bilan talon-toroj qilish) bo‘yicha jinoyat ishi qo‘zg‘atildi. Hozirda prokuratura organlari tomonidan tergov harakatlari olib borilmoqda.
