Namanganda 66 yoshli onaxon 4 metrlik quduqdan eson-omon qutqarib olindi
Hodisa 12-sentyabr kuni ertalab soat 06:46 da Chust tumanining “Xo‘jaobod” mahallasida joylashgan xonadonlardan birida yuz bergan. Fuqaroning chuqurlikka tushib ketgani haqidagi xabar 112 tizimi orqali favqulodda vaziyatlar bo‘linmasiga kelib tushgan.
Olingan tezkor ma’lumotga asosan qutqaruvchilar guruhi belgilangan manzilga zudlik bilan yetib borib, maxsus vositalar yordamida ayolga amaliy yordam ko‘rsatishgan. Onaxon quduqdan betalafot, xavfsiz tarzda chiqarib olinib, voqea joyida navbatchilik qilayotgan tibbiyot xodimlariga topshirilgan.
Shifokorlar ko‘rigidan so‘ng ma’lum bo‘lishicha, hodisa oqibatida 66 yoshli fuqaro hech qanday tan jarohati olmagan. Hozirda uning salomatligi va umumiy ahvoli yaxshi ekani bildirilgan.
