Moskvada o‘zbekistonlik migrantlar huquqini himoya qilish bo‘yicha muhim kelishuvga erishildi
28-avgust kuni Rossiya poytaxtida O‘zbekiston delegatsiyasi hamda Rossiya Ichki ishlar vazirligi, Bosh prokuraturasi va Tashqi ishlar vazirligi mulozimlari o‘rtasida muloqot bo‘lib o‘tgan. Uchrashuvning asosiy mavzusi Rossiya hududida bo‘lib turgan O‘zbekiston fuqarolarining huquq va qonuniy manfaatlarini har taraflama himoya qilish hamda migratsiya reydlari va tekshiruvlari davomida ularning huquqlari poymol etilishining oldini olishdan iborat bo‘lgan.
Muloqot chog‘ida, shuningdek, nazorat qilinuvchi shaxslar reyestriga tushgan va ijtimoiy himoyaga muhtoj toifadagi fuqarolarning huquqiy statusini tartibga solish hamda yuzaga kelayotgan muammolar bo‘yicha tezkor aloqa o‘rnatish masalalari ko‘rib chiqilgan. Tomonlar muammoli holatlarni zudlik bilan hal etish uchun idoralararo hamkorlikni kuchaytirishga kelishib olgan.
Uchrashuvda mehnat migratsiyasini tartibga solish, xususan, fuqarolarni Rossiyaga jo‘nab ketishdan oldin kasbiy va huquqiy tayyorgarlikdan o‘tkazish hamda tashkiliy tarzda ishga joylashtirish mexanizmlarini takomillashtirishga alohida e’tibor qaratilgan.
Yakunda ikki mamlakat vakillari migratsiya sohasidagi amaliy muloqot va yaqin hamkorlikni davom ettirish bo‘yicha kelishuvga erishgan.
Avvalroq Rossiyada qiynalgan migrantlar uchun vatanga bepul qaytishi uchun 24/7 aloqa raqamlari e’lon qilingan edi.
