Mirzo Ulug‘bek tumanidagi yong‘in vaqtida qutqaruv texnikasi nega hovli ichiga kiritilmagani ma’lum qilindi
Toshkent shahar Favqulodda vaziyatlar boshqarmasi ma’lumotiga ko‘ra, 16-avgust kuni soat 22:02 da Asaka ko‘chasida joylashgan ko‘p qavatli uyning tom qismida yong‘in sodir bo‘lgani haqida xabar kelib tushgan.
Qutqaruv bo‘linmalari voqea joyiga zudlik bilan yetib kelib, yong‘inni o‘chirish ishlarini boshlagan. Yong‘in 22:43 da qurshab olingan, soat 23:33 da esa to‘liq o‘chirilgan. Hodisa oqibatida tan jarohati olganlar qayd etilmagan.
Ijtimoiy tarmoqlarda yong‘in vaqtida qutqaruv texnikasi binoning orqa tomonidagi hovliga kira olmagani haqida xabarlar tarqaldi. Boshqarma izohiga ko‘ra, texnikani hovli ichiga kiritish uchun vaqt sarflash maqsadga muvofiq emas deb baholangan. Shuningdek, hududdagi sharoit sabab maxsus texnikaning o‘ziga zarar yetishi ehtimoli ham bo‘lgan.
Shu sababli qutqaruvchilar mavjud imkoniyatlardan foydalangan holda yong‘inni o‘chirish ishlarini davom ettirgan. Hozirda yong‘inning kelib chiqish sababi va yetkazilgan zarar miqdori aniqlanmoqda.
