Mirzo Ulug‘bek tumanida Spark maktab o‘quvchisini urib yubordi
Mirzo Ulug‘bek tumanida maktab o‘quvchisi ishtirokida yo‘l-transport hodisasi sodir bo‘ldi. Hodisa 14-sentyabr kuni soat 17:25 larda Feruza ko‘chasida joylashgan 205-sonli maktab ro‘parasidagi piyodalar o‘tish joyida yuz bergan.
Ma’lum bo‘lishicha, 1990-yilda tug‘ilgan haydovchi Spark rusumli avtomobilida harakatlanib ketayotgan vaqtda yo‘lni kesib o‘tayotgan piyodani urib yuborgan. Dastlabki ma’lumotlarga ko‘ra, 2015-yilda tug‘ilgan voyaga yetmagan piyoda taqiqlovchi qizil chiroqqa qaramasdan yo‘lga chiqqan.
Yuz bergan ushbu YTH yuzasidan Toshkent shahar IIBB YHXB mas’ullari tomonidan surishtiruv ishlari olib borilmoqda. Huquq-tartibot organlari barcha yo‘l harakati ishtirokchilarini belgilangan qoidalarga va svetofor ishoralariga qat’iy rioya qilishga chaqirmoqda.
