Milliy sertifikat ballarini hisoblash tartibi o‘zgartirilishi mumkin
Oliy ta’lim, fan va innovatsiyalar vazirining birinchi o‘rinbosari Sardor Rajabov ta’kidlaydiki, milliy sertifikat imtihonlari va odatiy kirish testlari o‘rtasida mazmuniy tafovut mavjud. Sertifikat sinovlarida ochiq topshiriqlar qo‘llanilib, natijalar xalqaro Rasch modeli bo‘yicha baholanadi. Oliy o‘quv yurtlariga kirishdagi standart testlarda esa asosan yopiq savollar berilishi sababli javobni tasodifiy topish ehtimoli saqlanib qoladi.
So‘nggi yillarda milliy sertifikat oluvchi talabgorlar soni keskin ortib bormoqda. Vazirlik mutasaddilarining prognozlariga ko‘ra, yaqin yillarda sertifikat bilan hujjat topshiruvchilar ko‘rsatkichi odatiy formatda imtihon topshiradigan abituriyentlar sonidan ham o‘tib ketishi kutilmoqda. Bu esa baholash mexanizmini yanada adolatli shaklga keltirishni talab etadi.
Amaldagi tartibga ko‘ra, A+ va A darajadagi sertifikat egalariga mutaxassislik fanidan maksimal ball beriladi, qolgan darajalar (B+, B, C+, C) uchun esa ballar mutanosib ravishda taqsimlanadi. Majburiy fanlar bloki uchun esa ushbu darajalarning barchasiga to‘liq maksimal ball biriktirilgan. Mutaxassislar hozirda ushbu qoidalarning qabul natijalariga ko‘rsatayotgan ta’sirini tahlil qilmoqda, o‘zgarishlar bo‘yicha yakuniy qaror tahlillar yakunlangach qabul qilinadi.
