Migratsiya agentligida amalda ishlamagan xodimlarga milliard so‘mdan ortiq maosh to‘langani fosh bo‘ldi. Ular Musayevning shaxsiy xizmatkorlarimidi?
Bosh prokuratura huzuridagi Iqtisodiy jinoyatlarga qarshi kurashish departamentining Toshkent shahar boshqarmasi o‘tkazgan tekshiruvda agentlik mas’ullari budget mablag‘larini tushirishga aloqador ekani fosh bo‘ldi.
Tekshiruvga ko‘ra, agentlik xodimlari B.D. va N.A. amalda ishlamagan bo‘lsa-da, ularga 931,6 mln so‘m ish haqi hisoblangan. Shuningdek, intizomiy chora qo‘llanilgan 8 nafar xodimga Mehnat kodeksiga zid ravishda 88,5 mln so‘m to‘lab berilgan. Oqibatda jami 1 mlrd 20,1 mln so‘m budget mablag‘i rastrata yo‘li bilan tushirib ketilgan. Holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bo‘yicha jinoyat ishi qo‘zg‘atildi.
Ushbu rasmiy xabardan avval sohadagi manbalar va sobiq xodimlar ijtimoiy tarmoqlarda tafsilotlar da’vo qilgan edi. Xususan, agentlikning sobiq xodimi Azizbek Toshtemirovning ta’kidlashicha, qog‘ozda ishga rasmiylashtirilib, amalda ishlamay oylik olib yurgan ushbu shaxslar aslida agentlik rahbari Behzod Musayevning shaxsiy uyida xizmat qilgan ishchilar bo‘lgan. Uning da’volariga ko‘ra, tergov va surishtiruv jarayonlari doirasida rahbar o‘z aybini yashirish va mas’uliyatdan qochish maqsadida ushbu shaxslarni shoshilinch ravishda ishdan bo‘shatishga hamda hududiy filial xodimlariga bosim o‘tkazishga uringan. Ammo Departament bayonotida ushbu ma’lumotlarni ochiq qoldi va rasmiy izoh berilmadi.
Avvalroq, Koreyaga ishga yuborish bilan bog‘liq katta korrupsion jinoyat fosh etilgani xabar qilingandi. Sxema boshida turganlar jami 90 mln dollargacha odamlardan yig‘ib olgani aniqlangandi. Migratsiya agentligining Janubiy Koreyadagi vakolatxonsasi sobiq rahbari Azizbek Toshtemirov esa firibgarlikda ayblanib, Interpolning qidiruviga berildi. Ammo ko‘p o‘tmasdan uning ismi ro‘yxatdan olib tashlandi.
