Men iste’dodimni amalga almashtirdim – Xayriddin Sultonov
Xayriddin Sultonov Zomin tumanida yoshlar bilan uchrashuvda idorada va davlat xizmatida ishlayotganiga 35 yil bo‘lganini qayd etdi. Uning so‘zlariga ko‘ra, u muqaddam ham, hozirgi davlat rahbari davrida ham bir necha bor ijodga qaytish istagini bildirgan, biroq rad javobini olgan.
“Men necha marta ijodiy ishimga qaytay, bir ozgina o‘zimning ishlarim bilan shug‘ullanay deganimda, yo‘q, shu ishlarga hozir yordam berib turishingiz kerak deyishgan. Bu davlat xizmati xuddi armiyaga o‘xshagan joy. O‘zi chaqirib, demobilizatsiyaga bo‘shatmasa, o‘zingizdan o‘zingiz keta olmaysiz”, deydi u.
Yozuvchi o‘z faoliyati davomida asosiy maqsad va maslagi ziyolilar bilan davlatni bir-biriga yaqinlashtirish, hamkor qilish bo‘lganini qo‘shimcha qildi.
Xayriddin Sultonov internetda va turli davralarda uning iste’dodi borligi, biroq mansabga berilib, kitob yozishni tashlab ketgani haqidagi gap-so‘zlarga to‘xtaldi va bunga aniq javob berdi.
“Eshitib qolamanki, ba’zan mana shu odam ozmi-ko‘pmi talanti bor edi, shu amalga, mansabga berilib ketdi, iste’dodini amalga almashtirdi degan gaplarni aytishadi. Ha, men haqiqatan ham shu iste’dodimni, talantimni amalga almashtirdim, buni tan olaman. Lekin bu amalning nomi O‘zbekiston mustaqilligi degan amal edi. Bu vatanning ozodligi degan amal edi. Mening hamma yozgan va kelajakda yozadigan kitoblarimdan O‘zbekiston mustaqilligi baland turadi”, degan yozuvchi.
