Mehnat ta’tilidagi xodimni ishga chaqirib, tahdid qilgan Uzun tumani suv ta’minoti rahbariga xizmat tekshiruvi tayinlandi
Xabaringiz bor, Surxondaryo viloyati Uzun tumani Suv yetkazib berish xizmati davlat muassasasining yangi tayinlangan direktori A. Abdusattorov ta’tildagi xodimni majburiy ishga jalb qilib, unga tahdid qilgani haqida audioyozuv e’lon qilingan edi.
Rahbar va xodim o‘rtasidagi audiosuhbatda direktorning ochiqdan-ochiq tajovuzkorona muomalada bo‘lgani va haqoratli iboralarni qo‘llagani eshitiladi. Mehnat ta’tilida ekanini va sog‘lig‘i sababli shifokor nazoratida turganini aytgan xodimga rahbar rasmiy chaqiruv qog‘ozisiz do‘q-po‘pisa qilib, “Mendan prav so‘rama”, “Yoqmasa sur”, “Qoningni ichaman” degan tahdidli gaplar bilan bosim o‘tkazgan.
Uzun tumani hokimligi holat nazoratga olinib, tegishli tartibda o‘rganilayotganini bildirdi. Qayd etildiki, audioyozuvda aks etgan holatning barcha jihatlarini xolisona aniqlash, muloqot mazmun-mohiyatiga huquqiy baho berish, shuningdek, xizmat intizomi va odob-axloq qoidalari talablariga amal qilinganini aniqlash maqsadida A. Abdusattorovga nisbatan xizmat tekshiruvi tayinlangan.
Shuningdek, xizmat tekshiruvi yakunlari bo‘yicha aniqlangan holatlarga amaldagi qonunchilik hujjatlarida belgilangan tartibda tegishli huquqiy baho beriladi.
“Uzun tumani hokimligi davlat tashkilotlari va muassasalari xodimlaridan xizmat vazifalarini bajarishda qonunchilik talablariga, xizmat intizomi va odob-axloq qoidalariga qat’iy rioya etish, xodimlar va fuqarolar bilan muomala jarayonida hurmat, xolislik va kasbiy madaniyat tamoyillariga amal qilishni talab etadi”, deyiladi hokimlik xabarida.
