Markaziy Osiyodagi yirik avariya sabab O‘zbekiston viloyatlarida chiroq o‘chdi, Surxondaryoda blekaut kuzatildi
Energetika vazirligi ma’lum qiladiki, qo‘shni mamlakat tizimidagi nosozlik sababli Surxondaryo va boshqa bir qator viloyatlarda elektr energiyasi uzilgan. Tizimda vujudga kelgan favqulodda holat zanjirli reaksiya ko‘rinishida mintaqaviy energiya halqasiga ta’sir ko‘rsatgani bildirilmoqda.
Hodisa ortidan soha mutaxassislari tomonidan rejimni qayta tiklash hamda iste’molchilarni bosqichma-bosqich tarmoqqa qaytarish bo‘yicha tezkor ishlar boshlab yuborildi. Vazirlik vaziyat to‘liq nazoratga olingani va jarayon bo‘yicha qo‘shimcha axborot berib borilishini ma’lum qildi.
Oradan yarim soat o‘tib, birinchi ijobiy natijalar haqida xabar berildi. Xususan, avariyadan eng ko‘p jabrlangan Surxondaryo viloyatining elektr ta’minoti 80 foizga tiklandi. Hozirda respublikaning qolgan hududlarida ham elektr energiyasini uzluksiz uzatishni to‘liq tiklash ishlari davom ettirilmoqda.
