Maktabgacha va maktab ta’limi vazirligining yarim milliard so‘mlik tenderi bekor qilindi
Raqobatni rivojlantirish va iste’molchilar huquqlarini himoya qilish qo‘mitasi Maktabgacha va maktab ta’limi vazirligi tomonidan o‘tkazilgan tender jarayonini tekshiruvdan o‘tkazgan. Turli tadbirlarni tashkil etish bilan shug‘ullanuvchi kompaniyani tanlash bo‘yicha e’lon qilingan ushbu davlat xaridining umumiy qiymati 587,2 million so‘mni tashkil etgan.
O‘rganishlar davomida vazirlik tomonidan “Raqobat to‘g‘risida”gi qonunning 29-moddasi talablari buzilgani ma’lum bo‘lgan. Xususan, tanlov shartlarida potensial ishtirokchilar o‘rtasidagi halol raqobatni sun’iy ravishda cheklovchi hamda ayrim taraflarga ustunlik beruvchi bandlar mavjudligi aniqlangan.
Nazorat organi tomonidan taqdim etilgan majburiy ko‘rsatmadan so‘ng, vazirlik tender natijalarini to‘liq bekor qilgan. Raqobat qo‘mitasining ta’kidlashicha, bunday choralar byudjet mablag‘larining shaffof sarflanishini ta’minlash hamda barcha ishtirokchilar uchun teng imkoniyatlar yaratishga qaratilgan.
