Mahalla inspektorlariga katta huquq berildi. Endi ular yo‘l qoidasini buzganlarni ham jazolaydi
Prezidentning tegishli qarori bilan ichki ishlar organlarining jamiyat xavfsizligini ta’minlash yo‘nalishida yangi ishlash tizimi joriy etilmoqda. Tizim doirasida mahalla va ko‘chalarda huquqbuzarliklar sababini barvaqt aniqlash hamda fuqarolar murojaatlariga tezkor va to‘g‘ridan-to‘g‘ri munosabat bildirish ustuvor vazifa qilib belgilandi. Shu bilan birga, profilaktika inspektorining o‘z xizmat vazifalarini bajarishiga xalaqit berish yoki to‘sqinlik qilish holatlari uchun ma’muriy javobgarlik kiritilmoqda.
Yangi tartib bo‘yicha inspektorlarga berilgan qo‘shimcha vakolatlar doirasida ular birinchi marta sodir etilgan 17 turdagi kam ahamiyatli ma’muriy huquqbuzarliklar bo‘yicha rasman ogohlantirish qo‘llay oladi. Bundan tashqari, mahalla ichki ko‘chalari va yo‘laklarida yo‘l harakati qoidalarini buzish bilan bog‘liq 4 xil holat bo‘yicha ham bevosita ma’muriy jarima yoki chora ko‘rish huquqiga ega bo‘ldi.
Bungacha faqat tuman va shahar IIO boshliqlari hamda ularning o‘rinbosarlari vakolatida bo‘lgan 9 turdagi ma’muriy huquqbuzarliklar bo‘yicha ishlarni ko‘rib chiqish ham endilikda to‘g‘ridan-to‘g‘ri profilaktika inspektorlarining o‘ziga topshirildi. Bu yangilik mahalla darajasida huquq-tartibotni ta’minlash tezkorligini oshirishga qaratilgan.
